2.500 mozos participarán nos campamentos da Lanzada

A Deputación de Pontevedra aprobou hoxe a contratación dos servizos de asistencia técnica educativa dos campamentos no Centro de Vacacións de A Lanzada por 125.000 euros. Dende o 24 de xuño, data de inicio dos campamentos, participarán 2.500 nenos de tódolos concellos da provincia agás Vigo e Pontevedra.
Os rapaces participantes serán os nados entre os anos 1997 e 2002 (con idades comprendidas entre os 8 e os 13 anos). O prezo será de 68 € por neno, o que convirte a este campamento no máis barato de Galicia.
Os campamentos desenvolveránse en 10 quendas: do 24 de xuño o 30 de xuño; do 01 de xullo o 7 de xullo; do 08 de xullo o 14 de xullo; do 16 de xullo o 22 de xullo; do 23 de xullo o 29 de xullo; do 01 de agosto o 07 de agosto; do 08 de agosto o 14 de agosto; do 16 de agosto o 22 de agosto; do 23 de agosto o día 29 de agosto; e, finalmente, do 30 de agosto o 05 de setembro.

As solicitudes para participar deberán ter entrada nas oficinas da Cidade Infantil Príncipe Felipe con data máxima do 07 de Maio. Os nenos permanecerán sete días nestas instalacións tempo no que desenvolverán numerosas actividades de natureza, saídas á praia, veladas nocturnas, viaxe a Ons, e outras actividades lúdicas e deportivas.
Os campamentos da Deputación constitúen unha actividade alternativa para ampliar os coñecementos dos rapaces, para fomentar a súa sociabilidade e permite que os nenos realicen actividades enriquecedoras que difícilmente farían na casa. Perante sete días, os nenos inscritos terán a oportunidade de convivir con outros rapaces, comunicarse, convivir, traballar en grupo etc..

Nos últimos anos, a Deputación intensificou a actividade do Centro da Lanzada, de xeito que en cinco anos pasou de acoller durante o verán a 400 rapaces a preto de 2.500. No 2009 ampliáronse os campamentos de 8 a 10 turnos e tamén aumentaron en 20 o número de prazas de cada un.